سينما باراديزو الجديدة

الكمال السينمائي- Alegria Música la Mori بعضُ الحبِّ كالسِّينما؛ ينتهي المشهد، وتبقى الصورةُ عالقةً في الروح أفضل فلم شفته بحياتي، وصعب أحد ياخذ مكانه بگلبي. اليوم عشت أحلى أيام حياتي؛ عدت فلم الأوديسة، وشفت الأفضل، والأجمل، والأعظم سينما باراديسو، وكانت من أجمل لحظاتي. كنت أريد أتخطى الأوديسة، يطلعلي بسينما باراديسو بالسينما. ما أعرف شلون أوصف إحساسي بهاي اللحظة، وأصلاً تعجز الكلمات عن وصف اللي بداخلي. بس راح أحاول أحچي عن كلشي حسيت بيه وأنا أشوفه. من صدگ، فلم خلاني من أول دقيقة لآخر دقيقة وأنا مبتسم. عشت لحظات ويه شخصية توتو ما عشتها ويه أي شخصية من قبل ولا حتى شخصيه عشت وياها سنوات(خارج السينما). حسيت كأني عشت كل حياته وياه، وحبيت هاي الشخصية وتعلقت بيها من بداية الفلم لنهايته الفلم عيشني شعور ألفريدو وتوتو، وكانت أول مرة أشوف فلم إيطالي، ومن صدگ حبيت اللغة الإيطالية؛ أنطت طابع جميل وشاعري للفلم، ومن وراه حبيت إيطاليا واللغة الإيطالية أكثر الأفلام الإيطالية 🇮🇹 = تخلص من الفلم وإنت مغمور بالمشاعر؛ سينما تغذي روحك ومن أجمل اللحظات بالفلم، لحظة وداع ألفريدو لتوتو، وكلامه إله:«ما أريد أسمع منك، أريد أسمع الآخرين يتحدثون عنك.» لقطة عظيمة بكل معنى الكلمة وبالأخير، الفلم لامسني بشكل مو طبيعي، وأبد ما توقعته بهالمستوى. چنت شايل سقف توقعاتي وخفت يخذلني، بس العكس تماماً. حسيت كأني عايش ويه توتو بكل لحظة من طفولته، وحماسه للسينما، وعلاقته العميقة بـألفريدو، اللي جان أكثر من مجرد شخص بالفلم؛ جان شخص علّمه، وشجعه، ووقف وياه بوقت الكل ما جان فاهمه وأكثر شي عجبني بالفلم هو شلون يراوينا تأثير السينما على الناس. مو بس كتسلية، وإنما كذكريات ومشاعر ومواقف تبقى وياك طول العمر والنهاية… جانت بگد ما هي عظيمة، جانت تكسر الگلب، بس بطريقة جميلة. فلم ثقيل بمشاعره، وعظيم بتأثيره، ومن الأفلام القليلة اللي أحس مستحيل أنساها. وربما هذا هو الحب… أن ينتهي المشهد، لكن تبقى السينما في داخلك إلى الأبد