Den brysomme mannen

فلم نرويجي 🇳🇴 بصراحة، فلم غريب جداً وثقيل، ومو كل واحد راح يگدر يكمله أو حتى يستوعب فكرته. والمشكلة حاولت ألكاه بكل مكان، بس للأسف ما لگيت نسخة مترجمة، وبالأخير شفته بترجمة إنكليزية وحتى هاي نصها غلط. والغريب أكثر إن الفيلم نرويجي، ويُعتبر تقريباً فلم صامت، لأن يمكن الفيلم كله ما بيه أكثر من خمس دقايق حوارات، ومع هذا گدر يوصل أفكار عظيمة ويطرح تساؤلات فلسفية عميقة الفلم بالنسبة إلي يشبه إلى حد كبير فلم تورمان شو (الي انا أعتبره سيء)، لكن أشوفه نسخة أكثر غرابة وتطوراً من ناحية الطرح الفلسفي، وكأنه أخذ الفكرة إلى مستوى أعمق وأكثر سوداوية. إذا كان تورمان شو يناقش الحرية والوهم اللي ممكن يعيش بيه الإنسان من دون ما يدري، فهذا الفلم يتجاوز هالفكرة، ويخلّيك تتساءل عن معنى الحياة نفسها، وعن قيمة السعادة إذا كانت مجرد شعور فارغ، وعن شنو اللي يخلي الإنسان يحس فعلاً بأنه عايش أكثر شي يميز الفلم هو عالمه الغريب والمثالي من الخارج، لكن من الداخل تحس بيه فراغ مو طبيعي، وكأن الإنسان صار مجرد آلة تعيش يومها من دون أي مشاعر حقيقية أو معنى لوجودها. يطرح فكرة عميقة جداً، وهي هل السعادة وحدها تكفي حتى نعيش؟ وهل ممكن الإنسان يتخلى عن حريته ومشاعره مقابل حياة خالية من المشاكل والمعاناة؟ لو إن الألم والحزن وحتى اللحظات الصعبة هي جزء أساسي من إنسانيتنا؟ فلم يخليك تفكر هواي، وكل ما تتعمق بأحداثه راح تكتشف إن الموضوع أكبر من مجرد قصة غريبة، لأن الفلم يناقش طبيعة الإنسان ورغبته الدائمة بالبحث عن معنى لحياته، حتى لو كان هذا المعنى وسط عالم مليان بالمعاناة. إخراج غريب وأجواء باردة ومزعجة تخليك تحس بالضياع، وكل تفصيلة بيه تخدم الفكرة اللي يريد يوصلها يمكن مو فلم يناسب الكل، ويمكن هواي أشخاص راح يشوفوه ممل وثقيل، لكن بالنسبة إلي هو تجربة سينمائية استثنائية، ومن الأفلام اللي تثبت إن السينما مو بالضرورة تحتاج إلى حوارات طويلة أو أحداث سريعة حتى تكون عظيمة. أحياناً فكرة وحدة تكفي حتى تخلّيك تعيد التفكير بكلشي حولك. شنو فائدة إنك تعيش بعالم كلشي بيه متوفر، إذا انته ما تحس بأي شي؟ وشنو قيمة السعادة إذا كانت تُسلب منك حريتك وإنسانيتك؟