The Devil All the Time

Robert is peak in this movie. “DELUSIONS” واوو انا شنو شفت؟ فلم تحسه طافر من حقبة التسعينات او الثمانينات، فلم ذكرني بأجواء “There will be blood”، والصراحه اريد أنصف توم هولاند، صدمني بتمثيله بهاذ الفلم. ابد ما متوقعه يمثل بفلم درامي ويبدع، وشفناه بـفيلم "odyssey" وجان مو أفضل أداء إله كممثل درامي، لكن بهاذ الفلم ابدع ابدع ابدع، جسد الدور بشكل مثالي. وكالعادة روبرت باتينسون بكل لقطة يطلع بيها يخليني منتضر اي شي يسويه. ممثل عظيم ولو كمل على هاذ النحو راح يصير من الممثلين العظيمين تاريخياً ممثل يصدمني بمدة تجسيده للدور بكل فلم، وكل فلم يطلع بيه يرفع من تقييم الفلم بالنسبة الي والتصوير والموسيقى مثالي بشكل مو طبيعي، الموسيقى الي بالخلفيه هادئه ويه الاحداث الي تخليك تتوتر، وكلشي بالفلم يخليك تحس بجو غريب وثقيل. و اريد امدح الترابط بين الاحداث والشخصيات، عظيم شلون الفيلم يربط بين الشخصيات وكل حدث يخليك تفهم حدث ثاني، وحتى التنقل بين الازمان جان جداً حلو ومحسوب ياخي حسيت جاي اشوف فلم لنولان، الفلم كل شوي يغيرلك الزمن حسب الموقف الي تحتاجه بيه، وما يخليك تعرف كلشي من البداية، وإنما يخليك تجمع الأحداث وحدك إلى أن تبدأ الصورة تكتمل كدامك وأكثر شيء عجبني أن الفيلم مو بس يحجي عن أحداث وشخصيات، وإنما عن الإنسان نفسه، عن شلون الظروف والماضي ممكن يغيرون الإنسان، وشلون الإنسان مرات يكون نتيجة لأشياء ما اختارها بنفسه. كل شخصية تحس وراها قصة، وورا كل تصرف شيء خلاها تصير بهالشكل. والفيلم يخليك تفكر: إلى أي حد الإنسان مسؤول عن الشخص الي أصبحه؟ وهل الإنسان يقدر يهرب من ماضيه، لو يبقى جزء منه مهما حاول؟ وأكو فكرة حلوة بالفيلم، أن الألم مرات ما ينتهي عند الشخص الي عاشه، وإنما ينتقل لغيره ، والإنسان ممكن يأذي شخص ثاني بسبب جرح هو نفسه ما كان السبب بيه. وكأن دائرة الألم تستمر من شخص إلى شخص، وكل واحد يحمل جزء من شيء بدأ قبله الصراحه فلم أنصح أي شخص بيه، خصوصاً إذا يحب الأفلام الثقيلة الي ما تكتفي بأنها تحچيلك قصة، وإنما تخليك تفكر بالإنسان وطبيعته، وبشلون ممكن الظروف تصنع من الإنسان شخص ما كان يتخيل يوماً أنه راح يصير مثله.